CCN civui a zan thumnak “culture night“ timi ah Lai nunphung kong chim dingin caan nan ka pek ve caah CCN hruaitu upa nan dihlak cungah ka lung a lawm ko. Lai nunphung belte cu theihmi he kan theih lomi he a kau ngaimi a si caah a chim awk ka hngal lo. Mino civui a si bantuk in biahalnak pa hnih kan tuah hna lai i, a phi kan kawl ṭi hna lai. Mah a phi cu zeitindah a si khawh timi a ruang kan kawl ṭi fawn hna lai. Cu khawhin Norway Laimi kan tlau dengmangnak pa thum in ka chim lai i ka bia ka donghter te lai. Minute pa 15 nan ti nain, pa 10 ah dih khawh kai zuam lai.
Biahalnak pa khat
Zei ruangah dah Laimi kan phaknak ram kipah Khrihfabu kan dirh i, Laica cawnnak te hna, nunphung le zatlang committee te hna kan ser lengmang?
Biahalnak pa hnih
Zei ruangah dah Laimi kan phaknak ram kipah Chin Community hna kan ser i, atu bantuk in civui te hna kan tuah lengmang?
A phi
Biahalnak hi pa hnih a si nain, a phi cu pa khat a si ko. Cucu, kan fale nanmah pawl nihhin Laimi hi miphun pakhat kan si ve timi hi philh hna hlah sehlaw, kan holh le kan ca hi tlaihchan hna sehlaw, kan nunphung hi uar hna seh ti khi a si ko.
A ruang
Vawleicung Organization a ngan bikmi UNO nih miphun pakhat a timi cu, umnak vawlei(ram)a ngeimi, holh le ca a ngeimi, nunphung a ngeimi an si lai ti a si, an ti. Kan pale chimnak ah UN biakhiahnak DPI/1316-93925 November/1992-9m chungah Chin miphun cu vawleicung ah miphun pakhat an si ve tiah, ai ṭial an ti.
Asinain, kan umnak Kawlram a cozah nih miphun pakhat ah an kan pom duh lo. Kawlmi an si ve ko i, an holh ai dang an kan ti. Kawl siter an kan timh. Kawl biaknak biakter ve an kan timh. Kan ca cawnnak nawl an kan pe duh lo. Chin Natinal Day hmanh “Chin Pyine neh“ an kan tipiak. Kawlholh uarter an kan timh. Lainu a ṭhimi paoh an reng a kai. Miphun pakhat kan si ve a timi paoh an tlaih hna. Cu tikah kan pale cheukhat tapung an tho. Kan pale cheukhat Biabal sianginn an kai. Pastor an ṭuan i, kan holh le kan ca kan thiam lo ahcun kan tlau lai tiah pulpit cungin an chim. Laica cawnnak an tuah. Cucu 1963 in ai thok i, nihin ni tiang a si ko. Atu cu kan miphun ningpi in ral kan tho cang. Mah kong hi hika a ṭhangmi kan fale nih nan theih hrimhrim a hau.
Norway Laimi kan tlau dengmangnak pa thum
Nulepa kan tlau hmasa
Nulepa nih kan fale kan in chimh ngam ti lomi hna hi tlau hram kan i thoknak a si. Nulepa nih fale kan in chimh ngam ti hna lo ruangah a ṭha lomi zong kha a ṭha kan ti dih cang. Aa dawh lomi zong aa dawh kan ti dih cang. Fale cu nulepa nih cawnpiak ding ti cu Laiphung bak a si. Khrihfa phung zong a si fawn. Eden dum i Adam a holh lo ruangah mi vialte sual ah kan tla.
Kan fale nan tlau dengmang ve
Nan nule nan pa Norway holh an thiam lo ruangah zeihmanh a thei lomi mihrut hmuh ah nan hmuhmi hna hi nan tlau dengmangnak a si ve. Nan nule nan pa hi an fim ruang le an thiam ruangah nan nule nan pa an si lo. An thiam le an hngalh ruangah an si fawn lo. Hiti ning tein nan nule nan pa an si ko. Hiti ning te an si ko buin, nanmah hna Norway nan phanh khawh venak ding caah lih phunphun an chim ngam. An ral a ṭha. Ningzah an pah. Na nule na pa Norway holh an thiam lo zongah upat ko hna. An thiam lomi an hngalh lomi kha hmaipanh tein tuahpiak hna.
Nuleva karlak ah kan tlau dengmang lengmang
Tlau ciocio ah pa pawl hi voihnih le voithum in kan tlau. Kan fale kan chimh ngam ti hna lo pinah kan nupi le bia ka al(el)ngam ti hna lo. Nuleva cu midang veve bak kan si. Midang veve innchungkhar kan ser tikah Laiholh ah pa kha nupi a ṭhi kan ti. Nu kha va a ngei kan ti. Asinain, Norway ahcun nu nih pa nan kan ṭhit dih. Phungchimtu 7:28 chungah “pa thong khat chungah hin a fimmi pakhat cu a um ko lai, sihmanhsehlaw nufim ti hi cu a um bal lomi thil a si“ timi a um. Mah bia hi siangpahrang vialte lakah a fim bik timi Solomom siangpahrang pa chimmi a si. Nupi thong khat a ngeimi cu a si i, nu kong cu a theih tuk lai a fiang ko. Na pasal kha hawi a lawh lo zongah na pasal a si caah upat ko. Lai nunphung a si. Khrihfa ziaza zong a si fawn.